‛பிஜேபிக்குப் பிரசாரம் பண்ற சாக்கில் குஜராத்துக்கு வர்றார்’ என்று ஒரு நேரத்தில் எலான் மஸ்க்கின் வருகை - அரசியலாகக் கூடப் பார்க்கப்பட்டது. ஆனால், எலான் மஸ்க் நமக்குப் பெரிய பல்பாகக் கொடுத்துவிட்டு, சீனாவில் பெரிய முதலீட்டை எடுத்து வைத்துவிட்டார்.
டெஸ்லா, SpaceX மற்றும் ட்விட்டர் எக்ஸ் வலைதளத்தின் ஓனர் எலான் மஸ்க், இந்தியாவுக்கு வந்தால் நம் நாட்டு இளைஞர்களுக்குப் பெரிய வேலைவாய்ப்பு காத்திருக்கும் என்று பேசப்பட்டது. இதற்காக இந்தியாவில் வெளிநாட்டுக் கார்களுக்கான இறக்குமதிக்கு வரிவிலக்குகூட அளிக்கப்பட்டது. ‛இந்தியப் பிரதமர் மோடியைச் சந்திக்கக் காத்திருக்கிறேன்’ என்று சொன்ன எலான் மஸ்க், இந்த நிலையில்தான் திடீரென பீஜிங் மாகாணம் சென்று சீனப் பிரீமியர் லீ குயாங்கை (Le Qiang) சந்தித்து விட்டு வந்திருப்பது பல விவாதப் பேச்சுகளைக் கிளப்பியிருக்கிறது.
இந்தியாவில் முதல்கட்டமாக அவர், 3 பில்லியன் டாலரை முதலீடு செய்யப் போவதாகச் சொல்லிக் கொண்டிருந்தார்கள். ஆனால், நிலைமை தலைகீழாக மாறவிருக்கிறது. சீனப் பிரீமியருடனான பேச்சுவார்த்தையில், அவர் டெஸ்லாவின் Driver Assistance மற்றும் FSD (Full Self Driving) போன்ற முக்கியமான தொழில்நுட்பங்களை சீனாவில் எப்படிச் செயலாற்றுவது, அதை தன்னோட சொந்த ஊரான அமெரிக்காவுக்கு எப்படி எடுத்துட்டுப் போறது என்பது பற்றிப் பேசியதாகத் தெரிகிறது. ‛‛சீன - அமெரிக்கப் பொருளாதார மற்றும் வர்த்தக ஒத்துழைப்பின் உதாரணமாக மஸ்க்கின் வருகை அமைந்திருக்கிறது!’’ என்கிறார் சீனப் பிரீமியர் லீ. Tesla cyber truck in china
எலான் மஸ்க்கின் இந்த நடவடிக்கை ஏற்கெனவே எதிர்பார்த்ததுதான் என்கிறார்கள் சில ஆட்டோமோட்டிவ் எக்ஸ்பெர்ட்கள். இப்போதைக்கு டெஸ்லாதான் உலகின் மாபெரும் எலெக்ட்ரிக் கார் உற்பத்தி நிறுவனம். அதற்கே ஆட்டம் காண்பிப்பது யார் தெரியுமா? சீன எலெக்ட்ரிக் வாகன உற்பத்தி அரக்கர்களான BYD மற்றும் Nio போன்ற நிறுவனங்கள்தான். ஏற்கெனவே ஸ்டாக் மார்க்கெட்டில் டெஸ்லாவின் கிராஃபைச் சரித்தது BYDதான். Autonomous Driving தொழில்நுட்பத்திலும் சீனாவில் BYD பட்டையைக் கிளப்பிக் கொண்டிருக்கிறது.
சீனாவில் இப்போது FSD (Full Self Driving) தான் முக்கியமான தொழில்நுட்பமாகப் பார்க்கப்படுகிறது. நம் ஊரில் இங்கே ADAS (Advanced Driver Assistance System) என்று இப்போதுதான் இது வளர்ந்து வரும் தொழில்நுட்பமாக இருக்கிறது. அதாவது - கார்கள் தானாக லேன் மாறுவது, முன்னால் போகும் வாகனங்களின் தூரத்தைக் கணித்துத் தானாக பிரேக் பிடிப்பது, தானாகவே ஆக்ஸிலரேட்டர் மிதிப்பது, எமர்ஜென்ஸியாக பிரேக் பிடிப்பது என்று டிரைவர்கள் உதவியின்றி கார்களை இயக்குவதுதான் அடாஸ் தொழில்நுட்பம்.
அங்கே ADAS-லும் FSD-யிலும் கொடி கட்டிப் பறக்கும் Baidu என்கிற சீனத் தொழில்நுட்ப நிறுவனத்துடன் டெஸ்லா கை கோர்த்து, அதற்கான ஜிபிஎஸ் மேப்பிங் டேட்டா போன்ற சேவைகளுக்கு உரிமம் வாங்கியிருப்பதாகத் தெரிகிறது.
ஏற்கெனவே டெஸ்லா, 2020 கொரோனா காலம் முதலே கார் மேப்பிங் போன்ற டேட்டாக்களுக்கு Baidu-யைத்தான் பயன்படுத்தி வருகிறது என்பது கவனிக்க வேண்டிய விஷயம். ஆனால், அது சீனாவில் டெஸ்லா கார் ஓட்டும் உரிமையாளர்களின் தரவுகள் மட்டும்தான். சீனாவைத் தாண்டி வெளியே போகாது அந்த டேட்டாக்கள். அதாவது, சீன ஓட்டுநர்களின் தரவுகளை அமெரிக்காவுக்கான ஏற்றுமதிக்கு Baidu ஒப்புக் கொண்டிருப்பதாகத் தெரியவில்லை. Tesla in China Auto Expo
டெஸ்லா கார்களின் ஸ்பெஷலே ஆட்டோ பைலட் வசதிதான். ஆட்டோ பைலட்டில் சில கொடூரமான விபத்துகள் ஏற்பட்டதைத் தொடர்ந்து, பல்வேறு காரணங்களால், இந்த செல்ஃப் டிரைவிங் வசதி கொண்டு வரப்படவில்லை. என்னதான் இதில் பல கோளாறுகளும் பிரச்னைகளும் சொல்லப்பட்டாலும், ஆட்டோ பைலட் தொழில்நுட்பமும், எலெக்ட்ரிக்கும்தான் டெஸ்லாவின் மிகப் பெரிய பலங்கள். பல வாடிக்கையாளர்கள் கேட்டு வந்தாலும், இன்னும் ஆட்டோ பைலட் தொழில்நுட்பத்தை வழங்கவில்லை டெஸ்லா.
இந்த செல்ஃப் டிரைவிங் சாஃப்ட்வேர்கள் குறித்தும், இதற்கான டேட்டாக்களை சீனாவுக்கு வெளியே முக்கியமாக அமெரிக்காவுக்கு எடுத்து வர அனுமதி கோரியும்தான் சீனாவுக்கு விசிட் அடித்திருக்கிறார் எலான் மஸ்க். சீனாவில் இந்த FSD ஒப்பந்தம், டெஸ்லாவுக்குப் பெரிதாகக் கைகொடுக்கும் என்று மஸ்க் நம்பிவிட்டாராம். Elon Muskஅடப் போங்க மஸ்க்கு! ‛3 பில்லியன் டாலர் வேணாம்! அட்லீஸ்ட், சில மில்லியன் டாலராச்சும் இந்தியாவில் இன்வெஸ்ட் பண்ணுங்களேன்’ என்பது பல ஆட்டோமோட்டிவ் அனுபவஸ்தர்களின் ஆசையாக இருக்கிறது. அட, வேலைவாய்ப்புக்குத்தாங்க!
http://dlvr.it/T6X5qL
0 comments:
Post a Comment